Sonntag - Olten -> Genova
Auso. Am Sonnti Morge am achti sind plötzlich 14 vollbepackti, gspannti Nasene mit violette T-shirts am Bahnhof uftaucht. De boulderndi Hannes, di verhörscheti Gianna, de chilligi Raffi ond alli andere Chlätterfanatiker hei sech kenneglehrt ond ufe Wäg gmacht is Unbekannte.

Montag - Sassari
Nach de mässig erholsame Übernachtig uf de Fähri ond (us Versehe) italienischem Schoggipudding statt Schoggimilch, hei mer s'erste mol üsi Händ a sarsinische Felse gleit. Nach erste Sicherigsinstruktione ond löchrigem Fels si mer dank em coole Columbus ond de schicke Sharon (üsne Autos) uf Cala Gonone transportiert worde, wo mer natürlech grad hei müsse en Obespaziergang mache ond am Meer hoi säge.

Dienstag - Cala Fuili
Met Müesli und prächtigem Wätter starte mer de erst ganz Chlättertag in Cala Fuili. Nach vill Topropes, Sichere und schwierigem, späckgem Felse hei mer üs de ersti Meeresschwumm ganz fest verdient gha! De Usblick ufs glasklare türkisblaue Meer isch s Highlight vo villne gsi. Bim Poste am Obe hei mer s erste mol d'Nocciolata entdeckt, en italienischi Nuss-Schoggi Creme. Das de Nocciolata-Konsum i dere Wuche uf öppe es ganzes Glas pro Person gstiege isch, hei mer vor allem am Silvan, üsem Bergfüerer, z'verdanke. Als Abschluss vom Tag hei mer Dorfbewohner im ne Werwölfle fürs Guete kämpft.

Mittwoch - Bucchi Arta
Mer starte i Tag met üsem Lieblingszmorge, Müesli und Nocciolata. Gestärcht fahre mer i eis vo üsne Lieblingsgebiet, Bucchi Arta. Es esch en riesigi senkrechti Wand mit schöne Listene. Begleitet vomene penetrante, Küder-essende Söili namens 'Cliffy', erprobe mer am Fels üsi Limite. Mer wärde vo de Backofetemperatur am Felse fast erschlage, mer entchöme am Sunnestich nor knapp ond rette üs is Salzwasser. 'S Dorf schloft ii...'

Donnerstag - Monte Bonacoa
Müesli mit Nocciolata zum zMorge, denn öppis nach de 8i wieder los, gspannt uf üsi Zufahrtsstrasse (Lut Topo: Achtung, dass sAuto nid am Bode ufahrt und der Stross folge bis es nümme wiiter goht). Nach 5 min. Zuestiig si mir de ou scho bim Felse acho. Nachdem d'Muriel ond d'Lea es gigantisches Felsloch entdeckt hei, sind de Till, de Hannes und de Mario vor schwarze Materie verschlückt worde. Gott sei Dank hei si dr Weg zrugg id Ussewelt wieder gfunde. Am Obe simmer aui id Unterwasserwelt iitoucht und hei mit Seeigu und Fische kämpft. Und denn isch es schwarz am Himmu worde und dWeerwöuf hei ihres Unwese trebe.

Freitag - S'Atta Ruja
Am nöchste Morge si aui Dorfbewohner verwachet und niemer isch die Nacht gestorbe.
Frisch gstärcht vo, wer hättis denkt, Müesli und Nocciolata, si mir i Tag gstartet. Flink si mir um euse quartiereignet Kreisel kurvet (mer wüsse bis hüt ned, öbs en Kreisel gsi isch oder ned) und scho si mir under de Felswand gstande. Verfolgt vo Dinosaurier hei mir eus düre Jurassicpark-Zuun und über d'Muur übere chönne rette. Aber ou nachem Zuun hei mir mit Dinos ztue gha. Wo eus das mit de Dinos z`viu worde isch, hei mir eusi innere Fledermüüs kanalisiert. Nach langem hin und her si mir de ou druf cho, dass Deadpoint und Totpunkt z'glichlige esch. Nach em Obeschwumm und em feine Znacht im Dörfli si ou d'Werwöuf zmüed gsi und dDorfbewohner chli am chränkele.

Samstag - Laerru
E Sunnegruess am Strand bi Sunneufgang mit Morgeschwumm het d'Geister geweckt, aber ou z'Verlange nachenem heisse Tee erweckt. Was mir zum Zmorge gha hei, erwähne mir jetzt nümm... Nachere effiziente Putzrundi hei mir eus es letzt mou ufem Weg zum Fels gmacht. Mer hei aues gäh und si denn begleitet vom Gölä, Lo & Leduc, Polo Hofer, Hecht, Kunz, Les Touristes und so wiiter luuthals mitsingend richtig Fähre gfahre. Nachem Picknick of de Fähri hei mer üs no bis spoot id Nacht z beschäftige gwüsst. D'Chinder rundume si ömu ou sehr fasziniert gsi vo üs und üsne lustige Kreisspeli. Wahrschinlech kennt jetzt die ganzi Fähre sLied: Feldbergstross vo Les Touristes, do mir euses Lagerlied überau ibout hei.

Sonntag
D Durchsag uf dr Fähre bezüglich Hafeeifahrt isch z'früeh, z'luut und z'lang cho. Nach Jogurth und Nocciolata si mir de is Outo und richtig Oute gfahre. Mer heis en Wuche lang fertig brocht druf z'verzichte, dromm hei mer feini Gelati gässe in Bellinzona. En super Abschluss!

Text  und Bilder: Carole Pfefferli und Lea Begue